Election 2011

O le a le Aso o le Faiga Palota Aoao?
Aso Faraile 4 Mati 2011
O le a le taimi e tatala ai Fale Palota?
Tatalaina 8.00 I le taeao ae Tapunia 3.00 afiafi
O fea fale palota e mafai ona ou palota ai?
E fautuaina lava le fai o lau palota masani (ordinary vote) i le fale palota i lou nuu pe afai o lo o e i totonu o le itumalo lea na e resitala e te palota ai aua o lo o lata ane ma vave ai foi ona e malolo pe a uma ona e palota.
Faapefea ona ou iloa fale palota I totonu o lo’u Itumalo?
O lo o lisiina atu Itumalo ma nuu i totonu o Itumalo faaalalafaga taitasi. O le lisi foi lea, e te iloa ai le Itumalo na e resitala ai pe afai na o le nuu palota lena e te manatua. O lo o lisiina atu foi i autafa fale palota i Itumalo taitasi.
E tatau ona ou palota?
E le faamalosia oe e te palota i lalo o le Tulafono o Faiga Palota 1963. Ae o lau palota e fai ai lou sao i Ie taitaiga o lou atunuu.
Faapefea ona ou palota pe afai o loo o’u mai I le falemai?
O lo o i ai fale palota feavea’i (mobile voting booth) mo falemai i Motootua ma Tuasivi e faasavali atu i potu o lo o taofia ai e mamai e fai ai a latou palota faapitoa
O a’u e leiloa faitautusi, leiloa foi tusitusi ae ua uma ona ou resitala. E maua se fesoasoani mo a’u i le aso o le palota?
E maua le fesoasoani mai ofisa faipalota mo e le iloa tusitusi, faitau tusi ma manaoga faapitoa (special needs). O lea fesoasoani e tuuina atu pe a e mua’i logoina le aufaigaluega i le taimi e te le’i alu e fai lau palota.
Faapefea pe afai ou te le ia i i totonu o lo’u Itumalo i le aso o le palota ae ua uma ona ou resitala ma ou te fia palota?
E i ai fale palota faapitoa o lo o lisiina atu i tua o lenei pepa i le talafatai o le taulaga, o lo o faia i faleaoga e mafai ona e alu i ai e fai ai lau palota masani. O fea lava le fale o lo o tusia e avea ma fale palota a lou itumalo o iina e faia lau palota masani. (Silasila i le faafanua ua faapipii i le auala ulufale i totonu o le lotoa.
Faatoa ou palota i le tausaga nei. O le a le faagasologa o le faiga o le palota pe a ou alu i le fale palota?
1. E fesili atu le au fai palota ia te oe i lou igoa ma pe na e palota muamua.
2. Ona siaki lea o lou igoa i luga o le lola
3. A maua lou igoa ona faailoga lea o lou lima matua taumatau i le vaitusi.
4. Tuu atu laupepa palota masani lanu paepae e tasi.
5. E tasi lava lau faailoga faasa’o (v) e te faia i totonu o le pusa e faafesagai tonu ma le suafa o le sui tauva ua e filifilia e te palota i ai
  - O Itumalo nei e ta’i lua o latou sui o le Palemene
  1. Vaimauga i Sisifo
  2. Aana Alofi Nu. 1
  3. Safata
  4. Falealili
  5. Faasaleleaga Nu. 1
  6. Salega
  7. Au Palota Taitoatasi
6. A fai palota a tagata palota o itumalo nei e tailua sui, e tofu pusa o lo o faafesagai tonu ma igoa o sui tauva e toalua ua e filifiliia e te palota i ai ma le faailoga faasa’o (v).
  
  E mafai foi pe afai e te filifili e na o le toatasi le sui e te filifilia, e na o le tasi foi le faailoga faasa’o e mafai ona e faia i lau pepa palota e ui lava e lua (2) sui o le Itumalo ile Palemene.
O le faagasologa o le faia o palota faapitoa, e pei lava ona faia i palota masani. Sei vagana ai vaega nei:
E muamua faatumu lau pepa o faamatalaga ma e saini ai ona tuu atu lea o le pepa palota faapitoa lanu meamata.
A uma ona tuu lau faailoga faasao i le pusa o le sui tauva ua e filifilia e te palota i ai, gaugau ma tuu i totonu o le potu o le teutusi o loo tusia ai upu nei “Ballot paper”. Faapipii lelei lona faapulou ma tuu i totonu o le pusa palota faapitoa ua faasino atu e le ofisa faipalota.
O le a le eseesega o le palota masani ma le palota faapitoa?
O le Palota masani e faitauina i le faitauga muamua lea e faia ina ua tapunia Faiga Palota i le ta o le 3.00 i le afiafi.O le Palota Faapitoa faatoa faitauina pe a faia le Faitauga Aloaia o palota i ni nai aso mulimuli ane e tusa ai ma le tulafono o Faiga Palota 1963.

O nei faamatalaga e maua i le upega o faamatalaga (website) a le Ofisa o le Komesina o Faiga Palota (www.oec.gov.ws). A fia malamalama atili fesootai sa’o mai i le telefoni 24538 poo le 25967 ext 20.

KOMESINA O FAIGA PALOTA